
遍知贝玛嘎波大师教言集PK245བཀྲ་ཤིས་ཚེ་རིང་མའི་ཆོ་ག་ཡིད་བཞིན་འདོད་འཇོ་བཞུགས་སོ།།
19-121
༄༅། །བཀྲ་ཤིས་ཚེ་རིང་མའི་ཆོ་ག་ཡིད་བཞིན་འདོད་འཇོ་བཞུགས་སོ།།
༄༅། །བཀྲ་ཤིས་ཚེ་རིང་མའི་ཆོ་ག་ཡིད་བཞིན་འདོད་འཇོ་བཞུགས་སོ།། ༄༅། །གྲུབ་པའི་དབུས་ན་མཆོག་གི་རྩེ་དགའ་ལ། །རྟག་པར་རོལ་མཛོད་བཞད་པ་རྡོ་རྗེའི་ཡུམ། །སྨིན་ལེགས་རྣམས་ཀྱི་དབང་ཕྱུག་ཚེ་རིང་མས། །བདག་ལའང་
བདེ་ལེགས་མཛོད་ཅེས་ཐལ་སྦྱོར་རོ། །མཆོག་དང་ཐུན་མོང་གི་དངོས་གྲུབ་ཡིད་བཞིན་དུ་འཇོ་བར་འདོད་པས། བཀྲ་ཤིས་ཚེ་རིང་མ་མཆོད་པར་བྱའོ། །དེ་ལ་དར་དྲི་མ་མེད་པའི་ཁར་གངས་གཟུགས་ཀྱི་
གཏོར་མ་ལྔ་ཚོམས་སུ་བཤམས། གསེར་གཡུ་མུ་ཏིག་བྱི་རུ་ལ་སོགས་པའི་འཕྲེང་བའི་ལྡ་ལྡི་དང་། དར་ཟབ་དཀོར་ནོར་ཇི་སྙེད་པའི་སྤྱན་གཟིགས། མེ་ཏོག་ཙན་དན་ཨ་ཀ་རུ་སི་ཧླ་ལ་སོགས་
པའི་བདུག་སྤོས། མར་མེ་བསུང་ཞིམ་པོའི་ཆུ། སྙན་པའི་རོལ་མོ། ཨམྲྀ་ཏ་སྦྱར་བའི་གསེར་སྐྱེམས་སོགས་མཆོད་པའི་ཡོ་བྱད་ཚོགས་པར་བྱས་ནས། ལྷག་པའི་ལྷའི་རྣལ་འབྱོར་རམ། རང་ཉིད་རྗེ་བཙུན་བཞད་པ་རྡོ་རྗེ་འཕགས་པ་སེམས་ཉིད་ངལ་བསོའི་སྟང་སྟབས་ཅན། 
19-122
རས་དཀར་པོའི་ཕྱ་རུ་གསོལ་བར་བསམས་ནས། ཨོཾ་སཱ་བྷཱ་ཝས་ཆོས་ཐམས་ཅད་ནམ་མཁའ་ལྟར་དག་པའི་མདུན་གྱི་གཞིར་བྷྲཱུཾ་ལས་རིན་པོ་ཆེའི་ས་གཞི་རྣམ་པར་བཀྲ་བའི་མེ་ཏོག་གི་ནགས་དང་།
སྤོས་ཀྱི་ལྗོན་པའི་འཕྲེང་བ་ཚར་དུ་དངར་བ་བྱ་དང་རི་དྭགས་ཡིད་དུ་འོང་བས་གཏམས་པ། ལྷ་དང་། དྲི་ཟ་དང་། མི་འམ་ཅི་དང་། གནོད་སྦྱིན་དང་། ལྟོ་འཕྱེ་དང་། བྱིན་སྐྱེས་དང་། གྲུབ་པ་
དང་རིག་པ་འཛིན་པའི་བུ་མོ་རྣམས་རྩེ་ཞིང་འཕྱོ་བ། དྲི་མ་མེད་པའི་ནེའུ་གསིང་གི་དབུས་སུ་པཾ་ལས་པདྨ་འདབ་མ་འབུམ་དང་ལྡན་པའི་ལྟེ་བར་སེང་གེ་དཀར་མོ་ལ་ཆིབས་པའི་ཇོ་
མོ་བཀྲ་ཤིས་ཚེ་རིང་མ་སྐུ་མདོག་དཀར་མོ། ཕྱག་གཡས་གསེར་གྱི་རྡོ་རྗེ་རྩེ་དགུ་པ་ནམ་མཁར་འཕྱར་ཞིང་གཡོན་འཆི་མེད་ཚེའི་བུམ་པ་འཛིན་པ། ཤར་དུ་རྐྱང་བུ་ཁ་དཀར་ལ་ཆིབས་པའི་
མཐིང་གི་ཞལ་བཟང་མ་སྔོན་མོ། ཕྱག་གཡས་འཕྲུལ་གྱི་མེ་ལོང་དང་གཡོན་ལྷའི་བ་དན་འཛིན་པ། ལྷོར་སྟག་མོ་དྲུས་མ་ལ་ཆིབས་པའི་མི་གཡོ་གླང་བཟང་སེར་མོ། ཕྱག་གཡས་སྟེར་བའི་ཚུལ་དང་
གཡོན་ལྷའི་ཟས་ཀྱི་གཞོང་པ་འཛིན་པ། ནུབ་ཏུ་ཤ་བ་ཡུ་མོ་ལ་ཆིབས་པའི་ཅོད་པན་མགྲིན་བཟང་མ་དམར་མོ། ཕྱག་གཡས་རིན་པོ་ཆེའི་སྒྲོམ་བུ་དང་གཡོན་ནོར་བུ་འཛིན་པ། བྱང་དུ་འབྲུག་སྔོན་མོ་ལ་ཆིབས་པའི་གཏད་དཀར་འགྲོ་བཟང་ལྗང་མོ། 
19-123
ཕྱག་གཡས་རྩྭ་དུར་པའི་ཆུན་པོ་དང་། གཡོན་སྦྲུལ་ཞགས་འཛིན་པ། ཐམས་ཅད་ཀྱང་གཟུགས་མཛེས་ཤིང་བལྟ་ན་སྡུག་པ། ལྷའི་བུ་མོ་ལོ་བཅུ་དྲུག་ལོན་པའི་ལང་ཚོ་དང་ལྡན་ཞིང་། བུ་སྐྲ་མཐོན་མཐིང་
ལྷས་མ་རྒྱབ་ཏུ་འཕྱང་ཞིང་ཅུང་ཟད་བཅིངས་པའི་ཟུར་ཕུད་ཡིད་བཞིན་གྱིས་ནོར་བུས་བརྒྱན་པ། སྙན་གོང་གསེར་དང་ཨུཏྤ་ལའི་འཕྲེང་བ་དང་རྣ་ལྟག་ཏུ་དར་གྱི་ཅོད་པན་གཡོ་བ། ནོར་བུའི་རྣ་
ཆ། གདུབ་ཀོར་དང་། མགུལ་རྒྱན་དང་། དཔུང་རྒྱན་དང་། ཕྱག་ཞབས་གསར་གྱི་གདུ་བུས་སྤྲས་ཤིང་། མུ་ཏིག་གི་དོ་ཤལ་དང་། རིན་པོ་ཆེའི་སྐ་རགས་ཅན། དར་དཀར་པོ་ཡིད་དུ་འཕྲོག་པའི་སྟོད་གཡོགས་དང་།
ཀ་ཙ་ལིནྡིའི་སྨད་གཡོགས་འཆང་བ། མཚར་སྡུག་འོད་དུ་ཆགས་པ་ཤིན་ཏུ་སྒེག་ཅིང་འགྱིང་བ་འཁོར་ལྷ་མ་སྲིན་རྒྱ་མཚོ་ལྟ་བུའི་དབུས་སུ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ།
དེ་ལས་འོད་འཕྲོས་མཐོན་མཐིང་རིའི་རྒྱལ་མོ་ནས་བཀྲ་ཤིས་ཚེ་རིང་མ་འཁོར་དང་བཅས་པ་སྐད་ཅིག་གིས་སྤྱན་དྲངས་པར་བསམས་ལ། བཛྲ་ས་མཱ་ཛཿ བྷྱོ། ཕུན་ཚོགས་དཔལ་དང་ལྡན་པའི་བལ་བོད་
མཚམས། །སྙན་ལྗོངས་འབབ་ཆུས་བརྒྱན་པའི་བསྐོར་བའི་ཞིང་། །ནགས་ཚལ་མེ་ཏོག་འཕྲེང་བ་འཁྲིགས་པའི་ས། །བཀྲ་ཤིས་མཐོན་མཐིང་རི་ཡི་རྒྱལ་མོ་ནས། །བོད་སྐྱོང་བསྟན་མ་ཆེན་མོ་ཀུན་གྱི་གཙོ། །ལྷ་སྨན་བཀྲ་ཤིས་ཚེ་རིང་དབང་ཕྱུག་མ། །
19-124
མཐིང་གི་ཞལ་བཟང་མི་གཡོ་གླང་བཟང་དང་། །ཅོད་པན་མགྲིན་བཟང་གཏད་དཀར་འགྲོ་བཟང་ལྔ། །ལྷ་དང་བྱིན་སྐྱེས་གནོད་སྦྱིན་དྲི་ཟ་དང་། །མི་འམ་ཅི་མོ་ལྟོ་འཕྱེ་རིག་པ་འཛིན། །གྲུབ་པའི་བུ་མོ་
མང་པོའི་བྲན་གཡོག་བཅས། །དེ་རིང་མིང་པོ་བདག་གི་སྒྲུབ་གནས་སུ། །དད་པའི་གདུང་བ་དྲག་པོས་ཁྱོད་འབོད་དོ། །སྲིང་ཅིག་མ་ཐོགས་མྱུར་དུ་གཤེགས་སུ་གསོལ། །ཆུ་འཛིན་སྤྲིན་གྱི་སྒོ་བར་ད་ཕྱེ་
ལ། །ཉི་ཟླའི་ཟེར་ལ་ཆིབས་ནས་ད་བྱོན་ཅིག །ཛཿཧཱུྃ་བྃ་ཧོཿ དམ་ཚིག་ཡེ་ཤེས་བསྲེས་བདུད་རྩི་བྱིན་ནས། བྷྱོ། སྔོན་ཚེ་དུར་ཁྲོད་སིང་ཧ་ལར། །གྲུབ་པའི་རྣལ་འབྱོར་མ་རྣམས་ཀྱིས། །ཕྱག་རྒྱ་གཉན་
པོའི་ཟིལ་འོག་མནན། །བཀའ་འབངས་བགྱིད་པར་རྩིས་ལ་ཕབ། །རང་རྟགས་སྲོག་གི་སྙིང་པོ་ཕུལ། །རྗེས་འཇུག་སྐྱོང་བར་དམ་ཡང་བཅས། །ད་ལྟ་བདག་གིས་བརྗེད་བསྐུལ་གྱིས། །མ་གཡེལ་བཅོལ་བའི་འཕྲིན་ལས་མཛོད། །མཁའ་
ལ་རོང་སྒོར་སྔོན་གསུས་ཚེ། སློབ་དཔོན་པདྨ་ཀཱ་ར་ཡིས། །ཕྱག་རྒྱ་གཉན་པོའི་ཟིལ་འོག་མནན། །བཀའ་འབངས༴ རང་རྟགས༴ རྗེས་འཇུག༴ ད་ལྟ་རྣལ་འབྱོར༴ མ་གཡེལ༴ ཆུ་བར་སྤྲུལ་སྐུའི་ཕོ་བྲང་དུ། །དབང་ཕྱུག་
བཞད་པ་རྡོ་རྗེ་ཡིས། །ཕྱག་རྒྱ་གཉན་པོའི༴ བཀའ་འབངས༴ རང་རྟགས༴ རྗེས་འཇུག༴ ད་ལྟ༴ མ་གཡེལ་བཅོལ་བའི་འཕྲིན་ལས་མཛོད། །དེ་ནས། ཨོཾ་ཨཱཿཧཱུྃ་གིས་བདུད་རྩིའི་རྒྱ་མཚོར་བྱིན་གྱིས་བརླབས་པའི་ཆང་ཕུད་གཏོར་ཅིང་། 
19-125
བྷྱོ། སྔགས་དང་ཏིང་ངེ་འཛིན་དང་ཕྱག་རྒྱ་ཡིས། །ཡེ་ཤེས་ལྷ་ཡི་བདུད་རྩིར་བྱིན་བརླབས་པས། །ཁ་དོག་དྲི་རོ་ཕུན་ཚོགས་གསེར་སྐྱེམས་འདི། །ལྷ་སྨན་རྒྱལ་མོ་འཁོར་དང་བཅས་ལ་འབུལ། །ཨོཾ་པཉྩ་ཌཱ་
ཀི་ནཱི་སརྦ་པཉྩ་ཨམྲྀ་ཏ་པཱུ་ཙ་ཁཱ་ཧི། རབ་འབྱམས་ནམ་མཁའི་ཁྱོན་རྣམས་ཇི་སྙེད་པ། །རྣམ་བཀྲ་རིན་ཆེན་མེ་ཏོག་ཆར་གྱིས་བཀང་། །དྲི་ཞིམ་བདུག་བའི་སྤོས་ཀྱི་སྤྲིན་ཕུང་འཁྲིགས། །ཉི་ཟླའི་སྣང་
བ་འཛིན་པའི་སྒྲོན་མེ་གཏམས། །དྲི་བཟང་ཆབ་ཀྱི་རྒྱ་མཚོ་རྣམ་པར་འཁྱིལ། །ལྷ་ཡི་བཟའ་བའི་ཚོགས་ནི་རི་ལྟར་སྤུངས། །སྙན་པའི་རོལ་མོས་གནམ་ས་འབིར་བྱེད་ཅིང་། །གསེར་གཡུ་མུ་ཏིག་ཕུང་པོ་གཅལ་
དུ་བཀྲམ། །ལྷ་མིའི་དཀོར་ནོར་ཇི་སྙེད་ཕྱོགས་བཅུར་བཀོད། གཙང་མའི་མཆོད་རྫས་མ་ཚང་མེད་པ་འདི། །ལྷ་སྨན་རྒྱལ་མོ་བཀྲ་ཤིས་ཚེ་རིང་མ། །མཆེད་ལྔ་འཁོར་དང་བཅས་ལ་འབུལ་བར་བགྱི། ། བྷྱོ། དགོས་
འདོད་ཡིད་བཞིན་སྟེར་བའི་གནོད་སྦྱིན་མོ། །ཨ་ཛི་དྷཱ་རའི་རིགས་ཀྱི་བུ་མོ་ནི། །མཚར་སྡུག་འོད་ཆགས་བཅུ་དྲུག་ལང་ཚོ་ཅན། །བལྟ་བས་མི་ངོམས་རབ་ཏུ་མཛེས་པའི་གཟུགས། །གངས་རིའི་མདངས་འཕྲོག་ཟླ་
ཞལ་འཛུམ་པའི་ཉམས། །ཨུཏྤལ་དཀྱུས་རིང་མིག་གི་ཟུར་མིག་མདའ། །སྨིན་མའི་གཞུ་བཀང་དལ་གྱིས་འཕེན་བྱེད་མ། །ཤངས་ཀྱུས་ཡིད་རིང་ལྟར་མཛེས་མཐོན་མཐིང་སྐྲ། །ལྷས་མ་རྒྱབ་ཏུ་འཕྱང་བའི་ཟུར་པུད་རྩེར། །ཡིད་བཞིན་ནོར་བུས་བརྒྱན་པའི་དཔལ་ཡོན་ཅན། །
19-126
སྙན་གོང་ཨུཏྤལ་གསེར་གྱི་པདྨ་དང་། །ཅོད་པན་འཕུར་ཞིང་རྣ་རྒྱན་ཡིད་འོང་ལྡན། །མཛེས་པར་མགུལ་རྒྱན་ཕྱག་ཞབས་གདུ་བུས་སྤྲས། །ནུ་འབུར་ངོས་སུ་མུ་ཏིག་དོ་ཤལ་ཅན། །ཕྲ་ཞིང་སྟ་ཟུར་ལྡེམ་པའི་
སྐེད་སྐབས་ལ། །གསེར་གྱི་སྐ་རགས་དྲིལ་ཆུང་སིལ་སིལ་སྒྲོག །རིང་མཛེས་དཀར་འཇམ་གཞོན་ཤ་རྒྱས་པའི་ཕྱག །གཡས་པ་དམ་ཚིག་རྡོ་རྗེ་ནམ་མཁར་འཕྱར། །གཡོན་པ་འཆི་མེད་ཚེ་ཡི་བུམ་པ་བསྣམས། །རབ་
དཀར་ལྷ་ཡི་གོས་ཀྱིས་སྟོད་གཡོགས་ཤིང་། །ཀ་ཙ་ལིན་དའི་གོས་ཀྱི་སྨད་གཡོགས་ཅན། །འོད་ཟེར་འབུམ་ཕྲག་དབུས་ན་ལྷམ་མེ་བ། །གསེར་གྱི་དྲ་བས་བརྗིད་པའི་གདོང་ལྔ་པའི། །སྟེང་དུ་ལྷུག་པར་གནས་
པའི་སྤྱོད་ཚུལ་གྱིས། །ཐུབ་པ་རྣམས་ཀྱང་བསམ་གཏན་འཇིག་བྱེད་པའི། །ཡིད་འོང་མིག་གི་བདུད་རྩི་ཚེ་རིང་མ། །མདུན་ན་མཐིང་གི་ཞལ་བཟང་མེ་ལོང་ལྟ། །གཡས་ན་མི་གཡོ་གླང་བཟང་ཁ་ཟས་ཐོགས། །
རྒྱབ་ན་ཅོད་པན་མགྲིན་བཟང་སྒྲོམ་བུ་འཛིན། །གཡོན་ན་གཏད་དཀར་འགྲོ་བཟང་དཱུར་བ་གཟུང་། །ཀླུ་མོ་རྣམས་ཀྱིས་ཁྲུས་ཀྱི་བྱ་བ་བྱེད། །མིའམ་ཅི་མོས་སྙན་པའི་གླུ་དབྱངས་ལེན། །དྲི་ཟའི་དགའ་མས་རིན་
ཆེན་རྒྱུད་མངས་སྤྲེང་། །མཐོ་རིས་མཛེས་མས་རྩེད་འཇོའི་གར་གྱིས་རོལ། །རྨུགས་འཛིན་ན་ཆུང་རིན་ཆེན་གདུགས་དཀར་འཛིན། །རིག་འཛིན་མ་རྣམས་རྔ་ཡབ་དལ་བུར་གཡོབ། །གྲུབ་པའི་བུ་མོ་དག་གིས་སིལ་སྙན་འཁྲོལ། །
19-127
ལྷ་མིན་མཛངས་མས་རྔ་དང་རྫ་རྔ་བརྡུང་། །ལྷ་སྲིན་སྡེ་བརྒྱད་དཔུང་བཞིས་མཐའ་བསྐོར་བས། །ནུ་ལྡན་ཀུན་གྱི་གཙོ་མོ་བཅོམ་ལྡན་མ། །ཕྱི་ལྟར་དུར་ཁྲོད་འཇིག་རྟེན་ཌཱ་ཀིའི་ཚུལ། །ནང་ལྟར་རིགས་ལྔའི་
མཁའ་འགྲོ་དམ་ཚིག་ཅན། །གསང་བ་རྒྱལ་བ་དགྱེས་མཛད་ཡུམ་ཆེན་ལྔས། །བདག་ལ་འཆི་མེད་ཚེ་ཡི་རིག་འཛིན་དང་། །བུ་སློབ་དར་ཞིང་རྒྱས་པའི་མཆོག་སྦྱིན་མ། །སྣང་སྲིད་གསལ་བ་འཕྲུལ་གྱི་མངོན་ཤེས་
དང་། །ཟས་ནོར་ཕྱུགས་ཀྱི་འགྲོ་བ་ཆེར་འཕེལ་བའི། །དངོས་གྲུབ་སྩལ་ནས་གསང་ཆེན་ལམ་བགྲོད་པའི། །ཉམས་རྟོགས་ཆེས་ཆེར་འཕེལ་བའི་གྲོགས་མཛད་དེ། །རྡོ་རྗེ་འཆང་དབང་ཐོབ་པར་བྱིན་གྱིས་རློབས། །རྣམ་པ་ཀུན་
ཏུ་འགལ་རྐྱེན་ཐམས་ཅད་ལས། །ལེགས་པར་བསྲུང་ཞིང་སྐྱོབ་པའི་འཕྲིན་ལས་མཛོད། །གཏོར་མ་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས་ལ་མཾ་ལཾ་ཨཾ་ཙཾ་ཏཾ་པཉྩ་ཌཱ་ཀི་ནཱི་ས་པཱ་རི་ཝཱ་
རེ་ཨི་དཾ་བ་ལིང་ཁ་ཁ་ཁཱ་ཧི་ཁཱ་ཧི། ལྔའམ་བདུན་གྱིས་ཕུལ། འདོད་པའི་སྨྲེང་གསོལ། སྒྲུབ་ཐབས་ནས་འབྱུང་བ་ལྟར་བཟླ་བར་བྱའོ། །སརྦ་གཙྪས་རང་གནས་སུ་གཤེགས་པར་བསམ་མོ། །དེ་ནས་བསྐུལ་
བར་འདོད་ན། ། ཧཱུྃ་བྷྱོ། འཇིག་རྟེན་ལས་ཀྱི་སྲིང་མོ་ནི། །མི་ཤ་ཁྲག་གི་དྲི་ཚོར་ན། །རྐན་རྡེབ་བཟོད་པའི་གླག་མེད་མ། །ཀེང་རུས་བཞད་པའི་བུད་མེད་གཅིག །རི་རབ་བང་དུ་འདེབས་པར་བྱེད། །
19-128
དམར་མོ་ཁྲག་འཛག་ཅེ་སྤྱང་གདོང་། །རྒྱ་མཚོ་ཆེན་པོ་ཧུབ་ཀྱིས་འཐུང་། །རབ་འཇིགས་གཤིན་རྗེའི་གཟུགས་ཅན་མ། །ཉི་ཟླ་ཆ་ལང་བཞིན་དུ་རྡེབ། །སོལ་བའི་བུད་མེད་གད་རྒྱངས་ཅན། །གཟའ་སྐར་ཐང་ལ་འབེབས་
པ་དང་། །ཤིན་ཏུ་སྒེག་པ་ལྷ་མོའི་གཟུགས། །འཛུམ་ཞིང་བསླུ་འདྲིད་བགྱིད་པ་ལྔ། །འཁོར་དུ་གདོན་ཆེན་བཅོ་བརྒྱད་དང་། །ཕྱོགས་སྐྱོང་བཅུ་ཡི་འཁོར་གདོན་དང་། །བྱིས་པའི་གདོན་ཆེན་བཅོ་ལྔ་སོགས། །བགེགས་རིགས་སྟོང་
ཕྲག་བརྒྱད་ཅུའི་ཚོགས། །ནམ་མཁའི་ལྷ་བྲན་མན་ཆོད་ནས། །ས་འོག་ལྟོ་འཕྱེ་ཡན་ཆོད་ཀྱི། །མི་བསྲུན་སྤྲུལ་པའི་གཟུགས་འཆང་ཞིང་། །ཞེ་རིང་གདུག་པའི་སེམས་ལྡན་པ། །གཟུགས་མེད་ལག་པ་རྐྱོང་བ་དང་། །རྩི་
ཤིང་ནགས་ཚལ་འགུལ་བ་དང་། །ས་རྡོ་རི་བྲག་རྒོད་པ་དང་། །ཕྱོགས་བཞིར་འོབས་ཀྱིས་བསྐོར་བ་དང་། །མཚམས་བཞིར་གྱད་ཀྱིས་བསྲུང་བ་དང་། །ནམ་མཁའ་མེ་ཡིས་འགེངས་པ་དང་། །ས་གཞི་ཆུ་ཡིས་གཏམས་པ་
དང་། །ཤིན་ཏུ་འཇིགས་བྱེད་ཆོ་འཕྲུལ་ཅན། །དཔུང་བཞི་དམག་གིས་གནམ་དང་ས། །བར་སྣང་གང་བའི་ལྷ་སྲིན་རྣམས། །རྣལ་འབྱོར་བདག་ལ་སྙན་གསོན་ཅིག །བདག་གིས་ཉེས་པ་བགྱིས་མ་བགྱིས། །ཡེ་ཤེས་སྤྱན་ལྡན་
ཁྱོད་ཀྱིས་མཁྱེན། །སྡིག་ཅན་དགྲ་བོ་འདི་བཞེས་ལ། །ཤི་སྲོག་དམར་པོ་འབེན་བཙུགས་ནས། །ང་ལ་མཐུ་དང་རྩལ་ཕྱུངས་ཟེར། །རྣལ་འབྱོར་བདག་ལ་བསྡོས་སུ་བཙུགས། །བདག་གི་སྐྱབས་མགོན་ཁྱེད་ལགས་པས། མིང་པོ་རྣལ་འབྱོར་ལས་བཅོལ་གྱིས། །
19-129
སྲིང་ཅིག་དམག་དཔུང་དགྲ་ལ་རྒྱོབ། །རྩིས་ཤོའི་རྡིའུ་དཀར་ནག་སྤུངས། །རྒྱན་གཞི་ཐིང་ལ་ཁྲམ་ཁ་ཐོབ། །དམ་ཉམས་བླ་ཚེ་སྲོག་ཕྲོགས་ལ། །རྣམ་པར་ཤེས་པ་རྟེན་དང་ཕྲོལ། ལུས་ཀྱི་ཤ་ཁྲག་མཆོད་པར་
བཞེས། །སྔོན་གྱི་དམ་བཅའ་གཉན་པོ་རྣམས། །མ་གཡེལ་མ་གཡེལ་འཕྲིན་ལས་མཛོད། །ཅེས་དམར་གྱི་གཏོར་མ་དགྲ་ཕྱོགས་སུ་འཕང་བར་བྱའོ། །ཡིད་ལ་འདོད་པའི་རེ་བ་ཇི་སྙེད་པ། །ཇི་བཞིན་སྟེར་བའི་ཡིད་
བཞིན་ནོ་བུའི་མཆོག །ཚེ་རིང་མཆེད་ལྔར་མཐོང་ནས་མཆོད་པའི་ཐབས། །པདྨ་དཀར་པོས་སྦྱར་འདི་རྒྱལ་གྱུར་ཅིག། །།མངྒལཾ།།
